ភ្នំពេញ៖ គិតចាប់ពីខែមករា ដល់ដំណាច់ខែមេសា ឆ្នាំ២០២៤ កម្ពុជាបាននាំចូលដែកនិងដែកថែប មានទឹកប្រាក់ចំនួន១៦៨លានដុល្លារ កើន ៣០,៦ភាគរយ ធៀបនឹងគ្រាដូចគ្នានៅឆ្នាំ២០២៣ ដែលមានទឹកប្រាក់ត្រឹមតែ ១២៩លានដុល្លារ។ តាមរបាយការណ៍របស់ អគ្គនាយកដ្ឋានគយនិងរដ្ឋាករ នៃក្រសួងសេដ្ឋកិច្ចនិងហិរញ្ញវត្ថុ។
សម្ភារៈធ្វើពីដែក ឬដែកថែប ក៏មានកំណើនគួរឱ្យកត់សម្គាល់ដែរ ការនាំចូលសម្ភារៈទាំងនេះមានកំណើនដល់ទៅ ៤៥,៤ភាគរយ ជាមួយទឹកប្រាក់ប្រមាណ ២២៤,៨១លានដុល្លារ បើធៀបនឹងឆ្នាំ៣០២៣ ការនាំចូលមានទឹកប្រាក់ត្រឹម ១៥៤លានដុល្លារ។ បើតាមកាបន្ត អគ្គនាយកដ្ឋានគយ។
អគ្គនាយកដ្ឋានគយ បានបន្តទៀតថា ការនាំចូលនូវសម្ភារៈទាំងនេះ ក៏បានបង្ហាញពីសកម្មភាពនៃវិស័យសំណង់នៅក្នុងប្រទេសកម្ពុជាចាប់ផ្ដើមមានសកម្មភាពឡើងវិញនៅក្នុងឆ្នាំ២០២៤ ដោយរំពឹងថា នឹងទទួលបានការវិនិយោគឡើងវិញជាបន្តបន្ទាប់ក្រោយពីសកម្មភាពនៃវិស័យនេះបានថមថយអស់រយៈពេលប៉ុន្មានឆ្នាំកន្លងមក។
បើតាម AMS បានស្រងសំដី អ្នកនាង គឹម គិនកេសា នាយិកាគ្រប់គ្រងប្រចាំប្រទេសកម្ពុជានៃក្រុមហ៊ុន CBRE ថា ក្នុងឆ្នាំ២០២៤នេះ សកម្មភាពនៃការសាងសង់បានចាប់ផ្ដើមឡើងវិញ ជាពិសេសសម្រាប់សំណង់លើគម្រោងដែលបានជាប់គាំងកាលពីអំឡុងវិបត្តិកូវីដ-១៩ និងវិបត្តិសេដ្ឋកិច្ចសកល។
កម្ពុជា ត្រូវការពេលវេលាដើម្បីដោះស្រាយគម្រោងអភិវឌ្ឍន៍ដែលជួបប្រទះនឹងបញ្ហាប្រឈមឱ្យរួចរាល់ ក៏ដូចជាស្វែងរកវិនិយោគិនក៏ដូចជាអតិថិជនមកទិញនូវគម្រោងដែលបានសាងសង់លើសតម្រូវការកាលពីមុនវិបត្តិកូវីដ-១៩ ដូចជាគម្រោងខុនដូ អាផាតមិន ផ្សារទំនើបជាដើម។ ជាការគូសបញ្ជាក់ នាយិកាដដែល។
នាយិកាដដែល បានបន្ថែមថា សម្រាប់គម្រោងសាងសង់ថ្មីៗ ក្រៅពីគម្រោងសាធារណៈមិនទាន់ឃើញមានគម្រោងធំៗឯកជនច្រើនដូចមុននោះទេ៕
ដោយ៖ មឿន ឌីណា (Moeun Dyna)
