ស្វាយរៀង៖ វឌ្ឍនភាពគម្រោងសាងសង់ប្រឡាយដោះទឹក នៃប្រព័ន្ធធារាសាស្រ្តកំពង់ជ្រៃ ក្នុងខេត្តស្វាយរៀង ជំហានទី១លទ្ធផលការងារសម្រេចបាន ១០០% ខណៈ មន្ត្រីជាន់ខ្ពស់ ក្រសួងធនធានទឹក និងឧតុនិយម ណែនាំឱ្យមន្ទីរធនធានទឹក និងឧតុនិយមខេត្តស្វាយរៀង រៀបចំសំណើដើម្បីស្នើសុំគម្រោងជំហានទី២ ជាបន្ត។
លោក តន់ វ៉ាន់ថារ៉ា រដ្ឋលេខាធិការនៃក្រសួងធនធានទឹក និងឧតុនិយម និងជាប្រធានក្រុមសម្របសម្រួលការងារគ្រប់គ្រងធនធានទឹក និងឧតុនិយម ប្រចាំខេត្តស្វាយរៀង បានចុះពិនិត្យការងារកំណត់ផ្ទៃអាងទឹក និងវឌ្ឍនភាពគម្រោងសាងសង់ប្រឡាយដោះទឹក ទំនប់សណ្ដ និងសំណង់សិល្បការ្យនៃប្រព័ន្ធធារាសាស្រ្តកំពង់ជ្រៃ ក្នុងខេត្តស្វាយរៀង
ការពិនិត្យនេះ មានការចូលរួមពីលោកអភិបាលរងនៃគណៈអភិបាលខេត្តស្វាយរៀង លោកប្រធានមន្ទីរធនធានទឹក និងឧតុនិយមខេត្តស្វាយរៀង និងមន្ត្រីបច្ចេកទេសជាច្រើននាក់ នៅថ្ងៃទី៤ ខែមិថុនា ឆ្នាំ២០២៤។
លោក រដ្ឋលេខាធិការ និងក្រុមការងារបានចុះពិនិត្យការងារកំណត់ផ្ទៃអាងទឹក និងបានជំរុញក្រុមការងារឱ្យពន្លឿនការងារកំណត់ផ្ទៃអាងទឹកចំនួនបួន មាន៖ អាងទឹកដូនទយ អាងទឹកធ្លកកំបុត អាងទឹកស្វាយយា និងអាងទឹកបាធូ ស្ថិតនៅក្នុងស្រុកចន្ទ្រា ស្រុកកំពង់រោទិ៍ និងក្រុងបាវិត ខេត្តស្វាយរៀង ដើម្បីធ្វើការចុះបញ្ជីដីរដ្ឋ។
ជាមួយគ្នានេះដែរ លោក តន់ វ៉ាន់ថារ៉ា បានបន្តចុះពិនិត្យវឌ្ឍនភាពគម្រោងសាងសង់ប្រឡាយដោះទឹក ទំនប់សណ្ដ និងសំណង់សិល្បការ្យនៃប្រព័ន្ធធារាសាស្រ្តកំពង់ជ្រៃ ស្ថិតក្នុងឃុំស្វាយធំ និងឃុំឈើទាល ស្រុកស្វាយជ្រំ ជំហានទី១។
នៅជំហានទី១នេះ ការងារសំខាន់ៗ រួមមាន៖ ១-ស្ដារប្រឡាយដោះទឹកប្រវែង ៥៥០ម៉ែត្រ, ២-សាងសង់ទំនប់សណ្ដប្រវែង ៥៥០ម៉ែត្រ និង ៣-សាងសង់សំណង់បិទបើកទឹកចំនួន ២កន្លែង។ គិតមកដល់ពេលនេះ លទ្ធផលការងារសម្រេចបាន ១០០%។
លោក តន់ វ៉ាន់ថារ៉ា បានវាយតម្លៃខ្ពស់ចំពោះលទ្ធផលការងារ ដែលសម្រេចបាន១០០% នៅជំហានទី១ នាពេលនេះ និងបានណែនាំឱ្យមន្ទីរធនធានទឹក និងឧតុនិយមខេត្តស្វាយរៀង រៀបចំសំណើ ដើម្បីស្នើសុំគម្រោងជំហានទី២ ជាបន្ត ដែលរួមមាន៖ ១-ស្ដារប្រឡាយដោះទឹកប្រវែង ៥ ២៩១ម៉ែត្រ និង ២-សាងសង់សំណង់សិល្បការ្យចំនួន ៨កន្លែង ដើម្បីបញ្ចប់គម្រោងឱ្យបានមុនភ្លៀងធ្លាក់ និងអាចស្តុកទឹកបានក្នុងអាងសម្រាប់បម្រើការងារស្រោចស្រពផងដែរ៕
ដោយ៖ មឿន ឌីណា (Moeun Dyna)
