ភ្នំពេញ៖ អ្នកជំនាញអចលនទ្រព្យបានមើលឃើញថា ដីធ្លីតាមបណ្ដោយផ្លូវក្រវាត់ក្រុងទី៣ ដែលរាប់ចាប់ពីផ្លូវឈ្នះឈ្នះ ឬពលរដ្ឋនិយមហៅថា ផ្លូវកប់ស្រូវ(រាជធានីភ្នំពេញ)ទៅភ្ជាប់ជាមួយផ្លូវជាតិលេខ៣ នឹងមានសក្ដានុពលខ្ពស់ ហើយជាតំបន់ដែលមានការអារម្មណ៍ខ្លាំងពីសំណាក់អ្នកវិនិយោគ និងអ្នកអភិវឌ្ឍន៍ផងដែរ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានប្រាប់បណ្ដាញសារព័ត៌មានក្នុងកាលពីពេលថ្មីៗនេះថា «តំបន់តាមបណ្ដោយផ្លូវក្រវាត់ក្រុង យើងឃើញថាតំបន់ប៉ែកខាងលិចឆៀងខាងត្បូង គឺជាតំបន់ដែលមានសក្ដានុពលសម្រាប់អភិវឌ្ឍន៍ ដូចជាសាងសង់ឃ្លាំងសម្រាប់ជួល ព្រោះទីតាំងនោះសំបូរទៅដោយរោងចក្រសហគ្រាស ដែលមានតម្រូវការឃ្លាំងសម្រាប់ស្តុកទំនិញនានាមុននិងក្រោយផលិត»។
ដីធ្លីនៅតំបន់នេះ នឹងមានតម្រូវការខ្ពស់សម្រាប់អភិវឌ្ឍន៍ ហើយសម្រាប់តំបន់ប៉ែកខាងត្បូង និងខាងកើតវិញ វាជាតំបន់ដែលនឹងមានតម្រូវការលើដីលំនៅឋាន។ បើតាមការបន្ត លោក ប៉ូ អ៊ាវគង់។
លោក បានបន្ថែមថា ជាក់ស្ដែងដូចបានឃើញស្រាប់នៅប៉ែកខាងត្បូងនិងខាងកើត កំពុងមានការអភិវឌ្ឍជាបន្តបន្ទាប់លើលំនៅឋានដោយមានទាំងលំនៅឋានផ្ដោតលើអ្នកមានចំណូលមធ្យម និងអ្នកមធ្យមឡើង ។
គូសបញ្ជាក់ថា ផ្លូវក្រវាត់ក្រុងទី៣ បានសម្ពោធដាក់ឱ្យប្រើប្រាស់ជាផ្លូវការក្រោមអធិបតីភាព សម្ដេចតេជោ ហ៊ុន សែន អតីតនាយករដ្ឋមន្ត្រីកម្ពុជា។ វិថីដ៏ធំទូលាយមួយនេះ មមាញឹកដោយការដឹកជញ្ជូនសព្វសារពើនិងការធ្វើដំណើររបស់ប្រជាពលរដ្ឋ។ ទន្ទឹមនេះ សកម្មភាពអភិវឌ្ឍនៅសំណង់តូចធំនិងការធ្វើអាជីវកម្មនានាក៏កំពុងរីកដុះដាលយ៉ាងលឿនផងដែរ។
ផ្លូវក្រវាត់ក្រុងទី៣ នេះ មានប្រវែងសរុប ៥២,៩៨គីឡូម៉ែត្រ (ផ្លូវមេប្រវែង ៤៧,៦១គ.ម និងផ្លូវខ្នែងប្រវែង ៥,៣៧គ.ម) មានចំណុចចាប់ផ្តើមត្រង់រង្វង់មូលមហាវិថីឈ្នះ-ឈ្នះ ចម្ងាយ ៥០០ម៉ែត្រ ពីផ្លូវជាតិលេខ៤(គីឡូម៉ែត្រលេខ១៤+១០៥) ស្ថិតក្នុងភូមិជម្ពូវ័ន្ត២ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ក្នុងគម្រោងនេះផ្លូវដែរ មានរួមបញ្ចូលនូវស្ពានឆ្លងកាត់ទន្លេបាសាក់ ២កន្លែង ក្នុងនោះស្ពានខាងកើតប្រវែង ៦៣០ម៉ែត្រ និងស្ពានខាងលិចប្រវែង ៣៦៦ម៉ែត្រ ស្ថិតក្នុងភូមិសាស្រ្តកោះអន្លង់ចិន ត្រូវបានប្រសិទ្ធនាមថា “ស្ពានមិត្តភាពកម្ពុជា-ចិន កោះអន្លង់ចិន”។
បន្ថែមពីលើនេះ ក៏បានសាងសង់នូវស្ពានរំលង ឬស្ពានអាកាស(Flyover) ២កន្លែង ប្រវែងសរុប ៥៦៤ម៉ែត្រ កាត់ពីលើផ្លូវជាតិលេខ៤ និងផ្លូវជាតិលេខ២១, ស្ពានរំលងប្តូរទិស(Interchange) ២កន្លែង ប្រវែងសរុប ៤៤០ម៉ែត្រ កាត់ពីលើផ្លូវជាតិលេខ២ និងផ្លូវជាតិលេខ៣, និងស្ពានមធ្យម និងខ្លី ចំនួន ១១កន្លែង ប្រវែងសរុប ៥៦៨ម៉ែត្រ។
លោក ស៊ុន ចាន់ថុល អតីតរដ្ឋមន្រ្តីក្រសួងសាធារណការ និងដឹកជញ្ជូន ចាត់ទុកផ្លូវក្រវាត់ក្រុងទី៣នេះ គឺជាដង្ហើមសេដ្ឋកិច្ចដ៏មានសក្តានុពលថ្មីមួយទៀតរបស់កម្ពុជា ជាពិសេសក្នុងភូមិសាស្រ្តរាជធានីភ្នំពេញ និងខេត្តកណ្តាល។
បើតាលោក ចាន់ថុល ខ្សែផ្លូវនេះ មានភាពប្រទាក់ក្រឡា និងតភ្ជាប់ជាមួយបណ្តាញខ្សែផ្លូវសំខាន់ៗ ដែលនឹងជំរុញបន្ថែមនូវសក្តានុពលនៃការដឹកជញ្ជូនទំនិញគ្រប់ប្រភេទ ។ ជាពិសេសការដឹកជញ្ជូនទំនិញចេញ-ចូលកំពង់ផែស្វយ័តភ្នំពេញ និងសម្រួលដល់ការធ្វើដំណើររបស់ប្រជាពលរដ្ឋ ពីតំបន់មួយទៅតំបន់មួយ ដោយពុំចាំបាច់ឆ្លងកាត់រាជធានីភ្នំពេញ ដែលអាចកាត់បន្ថយការកកស្ទះ កាត់បន្ថយគ្រោះថ្នាក់ចរាចរណ៍ និងចំណេញពេលវេលាធ្វើដំណើរបានមួយកម្រិតធំ។
ផ្លូវក្រវាត់ក្រុងនេះ បានតភ្ជាប់ជាមួយនឹងផ្លូវអាស៊ានហាយវេលេខ១(AH-1) និងផ្លូវអាស៊ានហាយវេលេខ១១(AH-11) និងផ្លូវរបៀងសេដ្ឋកិច្ចភាគកណ្តាល និងភាគខាងត្បូងនៃមហាអនុតំបន់មេគង្គ ដែលរួមចំណែកសម្រួលការដឹកជញ្ជូនឆ្លងកាត់ព្រំដែន ដោយជំរុញសកម្មភាពពាណិជ្ជកម្មអន្តរជាតិ និងការប្រកួតប្រជែងរបស់កម្ពុជា ជាមួយបណ្តាប្រទេសនានា នៅក្នុងតំបន់ប្រកបដោយប្រសិទ្ធភាព។ នេះបើតាមលោក ចាន់ថុល។
លូវក្រវាត់ក្រុងទី៣នេះ ប្រើប្រាស់រយៈពេលសាងសង់ចំនួន ៥២ខែ និងបានបញ្ចប់ការសាងសង់ជាស្ថាពរកាលពីខែមិថុនា ឆ្នាំ២០២៣ ដោយប្រើប្រាស់ថវិកាសាងសង់សរុបជាង ២៧៣លានដុល្លារអាមេរិក ដែលជាឥណទានសម្បទានពីរដ្ឋាភិបាលចិន រួមជាមួយថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់ ការបោសសម្អាតគ្រាប់មីន យុទ្ធភ័ណ្ឌមិនទាន់ផ្ទុះ និងពន្ធអាករផ្សេងៗ៕
ដោយ៖ មឿន ឌីណា (Moeun Dna)
