ខេត្តកែប៖ រាជរដ្ឋាភិបាលចាត់ទុក ខេត្តកែប ព្រះសីហនុ កំពត និងកោះកុង ជារបៀងសេដ្ឋកិច្ចដ៏ធំសម្រាប់កម្ពុជា ដូច្នេះអាជ្ញាធរខេត្ត និងប្រជាពលរដ្ឋត្រូវសហការគ្នាខិតខំអភិវឌ្ឍខ្លួន និងមានគំនិតច្នៃប្រឌិតក្នុងការកែច្នៃនូវអ្វីដែលថ្មីប្លែកសម្រាប់ទាក់ទាញទេសចរឱ្យចូលមកទស្សនាក្នុងខេត្តរបស់ខ្លួន ដើម្បីជំរុញលំហូរចរន្តសេដ្ឋកិច្ចក្នុងខេត្ត ក៏ដូចជាទទួលបានប្រាក់ចំណូលផ្គត់ផ្គង់ជីវភាពគ្រួសារឱ្យកាន់តែប្រសើរឡើង។

លោក សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកែប ថ្លែងក្នុងឱកាសបិទសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់រដ្ឋបាលខេត្តកែប កាលពីថ្ងៃទី៥ ខែមករា ឆ្នាំ២០២៤។

នាឱកាសនោះ លោក បានជំរុញនិងលើកទឹកចិត្តអាជ្ញាធរ ក្រុមការងារ ស្ថាប័នជំនាញ និងប្រជាពលរដ្ឋទាំងអស់រួមគ្នាថែរក្សាធនធានធម្មជាតិក្នុងខេត្តកែបដូចជាអាហារសមុទ្រជាដើម ហើយប្រើប្រាស់ឱ្យអស់សក្តានុពលនូវធនធានដែលមានក្នុងខេត្ត និងត្រូវពិនិត្យមើលស្ថានភាពតម្លៃបន្ទប់ស្នាក់នៅ ព្រមទាំងតម្លៃម្ហូបអាហារឱ្យបានត្រឹមត្រូវសមរម្យ រក្សាសន្តិសុខ សុវត្ថិភាព សណ្តាប់ធ្នាប់របៀបរៀបរយសាធារណៈឱ្យបានល្អ រៀបចំទីក្រុងក៏ដូចជារមណីយដ្ឋាននានាឱ្យមានសោភណ្ឌភាព ដើម្បីទាក់ទាញអ្នកទេសចរឱ្យមកលំហែកម្សាន្តក្នុងខេត្តកែបឱ្យបានច្រើន និងប្រែក្លាយខេត្តនេះទៅជាគោលដៅទេសចរណ៍ដ៏មានប្រជាប្រិយ។

ទន្ទឹមនេះ លោក សាយ សំអាល់ បានបញ្ជាក់ពីទិសដៅយុទ្ធសាស្ត្ររបស់រាជរដ្ឋាភិបាលកម្ពុជាក្នុងការលុបបំបាត់បញ្ហាទំនាស់ដីធ្លីនៅទូទាំងប្រទេស ដោយធ្វើយ៉ាងណាមិនឱ្យប្រជាពលរដ្ឋមានក្តីកង្វល់ ហើយងាកមកខិតខំប្រឹងប្រែងក្នុងការប្រកបមុខរបរ ឬអាជីវកម្មនានា ដើម្បីទទួលបានប្រាក់ចំណូលផ្គត់ផ្គង់ជីវភាពគ្រួសារឱ្យប្រសើរឡើង។ លោក ក៏បានណែនាំឱ្យមានការរៀបចំទីក្រុងឱ្យបានល្អដោយធ្វើយ៉ាងណាត្រូវស្ថាបនាផ្លូវសម្រាប់ឱ្យប្រជាពលរដ្ឋបានដើរធ្វើលំហាត់ប្រាណ ដើម្បីសុខភាព។

លោក បានគូសបញ្ជាក់ថា យុទ្ធសាស្ដ្រទាំងនេះ គឺសំដៅធ្វើយ៉ាងណាឱ្យប្រជាពលរដ្ឋមានសុខភាពល្អ មានស្នាមញញឹម មានលំនៅឋានរស់នៅសមរម្យ មានអាហារហូបចុកគ្រប់គ្រាន់ មានការងារធ្វើមានប្រាក់ចំណូលសម្រាប់ផ្គត់ផ្គង់ជីវភាពគ្រួសារ និងកូនចៅប្រជាពលរដ្ឋបានទៅសិក្សារៀនសូត្រ និងបន្តការសិក្សាថ្នាក់ឧត្តមសិក្សាព្រមទាំងមានអនាគតល្អគ្រប់ៗគ្នា។ ដូច្នេះ យើងទាំងអស់គ្នាត្រូវមានការឯកភាព សហការគ្នាអនុវត្តតាមតួនាទីភារកិច្ចដែលរាជរដ្ឋាភិបាលបានប្រគល់ជូន ដើម្បីឱ្យគោលដៅនេះសម្រេចបានជោគជ័យ ជាប្រយោជន៍សម្រាប់ជាតិ និងប្រជាជន៕

ដោយ៖ មឿន ឌីណា (Moeun Dyna)