ភ្នំពេញ៖ រយៈពេល៦ខែ ឆ្នាំ២០១៩ អគ្គនាយកដ្ឋានពន្ធដារប្រមូលពន្ធបានចំនួន ១៥២៦,៥៤លានដុល្លារ ស្មើនឹង ៦៦,៧១ភាគរយ នៃផែនការប្រចាំឆ្នាំ។ បើធៀបនឹងរយៈពេលដូចគ្នានៅឆ្នាំ២០១៨ បានកើនឡើង ៣២៤,៥៨លានដុល្លារ ស្មើនឹង២៨,៩៤ភាគរយ។

លទ្ធផលនៃការគ្រប់គ្រងប្រមូលចំណូលពន្ធក្នុងខែមិថុនា ឆ្នាំ២០១៩ ចំណូលពន្ធអាករ ដែលអគ្គនាយកដ្ឋានពន្ធដារប្រមូលបាន (តាមប្រព័ន្ធគ្រប់គ្រងទិន្នន័យចំណូលអនឡាញ Online របស់អគ្គនាយកដ្ឋានពន្ធដារ) មានចំនួន ៧៨៨,០៦ ប៊ីលានរៀល ប្រមាណជា ១៩៧,០២លានដុល្លារ ស្មើនឹង ៨,៦១ភាគរយ នៃផែនការប្រចាំឆ្នាំ។ បើប្រៀបធៀបទៅនឹងចំណូលពន្ធ-អាករ ប្រចាំខែមិថុនា ឆ្នាំ២០១៨ បានកើនឡើងចំនួន ២២៨,៧០ប៊ីលានរៀល ប្រមាណជា ៥៧,១៨លានដុល្លារ ស្មើនឹង៤០,៨៩ភាគរយ។ បើតាមការឱ្យពី លោក គង់ វិបុល អគ្គនាយកនៃអគ្គនាយកដ្ឋានពន្ធដារ។

ក្នុងកិច្ចប្រជុំបូកសរុបលទ្ធផល «ប្រមូលចំណូលពន្ធប្រចាំខែមិថុនា និងសមិទ្ធផលឆមាសទី១ ឆ្នាំ២០១៩ ព្រមទាំងលើកទិសដៅសម្រាប់អនុវត្តបន្ត» កាលថ្ងៃទី២៣ ខែកក្កដា នេះ លោក គង់ វិបុល បានឱ្យដឹងបន្តថា សម្រាប់រយៈពេល ៦ខែ ឆ្នាំនេះ ចំណូលពន្ធ-អាករដែលអគ្គនាយកដ្ឋានពន្ធដារប្រមូលបាន តាមប្រព័ន្ធគ្រប់គ្រងទិន្នន័យចំណូលអនឡាញ (Online) របស់អគ្គនាយកដ្ឋានពន្ធដារមានចំនួន ៦ ១០៦,១៧ប៊ីលានរៀល (ប្រមាណ១៥២៦,៥៤លានដុល្លារអាមេរិក) ស្មើនឹង ៦៦,៧១ភាគរយ នៃផែនការប្រចាំឆ្នាំ។

អគ្គនាយកនៃអគ្គនាយកដ្ឋានពន្ធដារ បន្ថែមថា ប្រសិនបើប្រៀបធៀបទៅនឹងរយៈពេលដូចគ្នានៃឆ្នាំ២០១៨ ឃើញថា ចំណូលពន្ធ-អាករសម្រាប់រយៈពេល៦ ខែ ឆ្នាំ២០១៩ បានកើនឡើងចំនួន ១ ៣៧០,៣២ប៊ីលានរៀល ប្រមាណជា ៣២៤,៥៨លានដុល្លារអាមេរិក) ស្មើនឹង២៨,៩៤ភាគរយ៕

ប្រភព៖ដើមអំពិល