ភ្នំពេញ៖ ពីខែមករា-ខែឧសភា ឆ្នាំ២០២៣ ពាណិជ្ជកម្មទ្វេភាគីរវាងកម្ពុជា និងវៀតណាម មានទឹកប្រាក់សរុប ២ ៨៧០,៥៩លានដុល្លារ កើនឡើង ២,៩% បើធៀបនឹងគ្រាដូចគ្នាឆ្នាំ២០២២ ដែលមានទឹកប្រាក់ ២ ៧៨៩,៤១លានដុល្លារ។ នេះបើយោងតាមតារាងស្ថិតិរបស់អគ្គនាយកដ្ឋានគយ និងរដ្ឋាករកម្ពុជា។
ការនាំចេញទំនិញពីកម្ពុជាទៅវៀតណាម មានទឹកប្រាក់ ១ ៣២៣,៨៥លានដុល្លារ កើនឡើង ២២,៧% ពីចំនួន ១ ០៧៩,០១លានដុល្លារ និងទំនិញវៀតណាមនាំមកកម្ពុជា ១ ៥៤៦,៧២លានដុល្លារ ធ្លាក់ចុះ ៩,៦% ពីចំនួន ១ ៧១០,៤លានដុល្លារ។ បើតាមការបញ្ជាក់នៅក្នុងតារាងស្ថិតិខាងលើ។
បើតាមតារាងស្ថិតិខាងលើ បានបន្ថែមថា សម្រាប់ខែឧសភា ឆ្នាំ២០២៣ ទំហំពាណិជ្ជកម្មរវាងប្រទេសទាំងពីរ មានទឹកប្រាក់ ៤៤០,១៥លានដុល្លារ ធ្លាក់ចុះ ៩,៦% បើធៀបនឹងខែឧសភា ឆ្នាំ២០២២ មានចំនួន ៤៨៦,៨៨លានដុល្លារ។ ក្នុងនោះកម្ពុជា នាំទំនិញទៅវៀតណាម ១៤២,៣៩លានដុល្លារ កើនឡើង ៤០% និងវៀតណាមនាំទំនិញមកកម្ពុជា ២៩៧,៧៦លានដុល្លារ ធ្លាក់ចុះ ២២,៧%។
សូមរម្លឹកថា កាលពីឆ្នាំ២០២២ ពាណិជ្ជកម្មទ្វេប្រទេសទាំងពីរ មានទឹកប្រាក់សរុប ៦ ១៣៥,៧៦លានដុល្លារ កើនឡើង ១៩,៦% ធៀបឆ្នាំ២០២១ ក្នុងនោះកម្ពុជានាំទំនិញទៅវៀតណាម មានទឹកប្រាក់ ២ ១៦៨,៦១៩ លានដុល្លារ កើនឡើង ៩,២% និងទំនិញវៀតណាមនាំមកកម្ពុជា មានទឹកប្រាក់ ៣ ៩៦៧,១៤១៣លានដុល្លារ កើនឡើង ២៦,២%។
បើតាមប្រាប់ភ្នំពេញប៉ុស្តិ៍ បានស្រង់សំដី លោក លឹម ហេង អនុប្រធានសភាពាណិជ្ជកម្មកម្ពុជាឱ្យដឹងថា ផលិតផលសំខាន់ៗ ដែលកម្ពុជា នាំទៅវៀតណាម រួមមានដូចជា៖ ស្រូវ កៅស៊ូ ស្វាយចន្ទី ដំឡូងមី ពោត ចេក ស្វាយ ថ្នាំជក់ និងធនធានធម្មជាតិ។ ចំណែកវៀតណាម នាំមកវិញ មានដូចជា៖ សម្ភារសំណង់ គ្រឿងម៉ាស៊ីន ប្រេងឥន្ធនៈ ខបករណ៍អេឡិចត្រូនិក-អគ្គិសនី ជីកសិកម្ម គ្រឿងទេស និងបន្លែ ផ្លែឈើ ជាដើម។
ភ្នំពេញប៉ុស្តិ៍ ដដែល ក៏បានបានស្រង់សំដី លោក គី សេរីវឌ្ឍន៍ អ្នកសេដ្ឋកិច្ចនៃរាជបណ្ឌិត្យសភាកម្ពុជាថា ក្នុងនាមជាប្រទេសមានព្រំដែនជាប់គ្នា និងមានទំនាក់ទំនងការទូតល្អ ការផ្លាស់ប្តូរពាណិជ្ជកម្មរវាងប្រទេសទាំងពីរ បានបង្ហាញសញ្ញាវិជ្ជមានជាបន្តបន្ទាប់ ពិសេសការនាំចេញរបស់កម្ពុជា។
ការកើនឡើងនៃសមត្ថភាពផលិតកម្មក្នុងស្រុក បានធ្វើឱ្យកម្ពុជាមានសមត្ថភាពកាន់តែខ្លាំង ក្នុងការបំពេញឱ្យតម្រូវការក្នុងស្រុក និងជំរុញការនាំចេញ ពិសេសប្រទេសជិតខាង។ នេះបើតាមការបន្តរបស់ លោក គី សេរីវឌ្ឍន៍ បាន បញ្ជាក់ថា ដោយសារប្រទេសទាំងពីរមានព្រំដែនជាប់គ្នា ដូច្នេះទំហំទឹកប្រាក់ផ្លាស់ប្តូរពាណិជ្ជកម្មរអាចមានខ្ពស់ជាងនេះច្រើន៕
ដោយ៖ មឿន ឌីណា (Moeun Dyna)
