សៀមរាប៖ សមាគមពាណិជ្ជកម្មអន្តរជាតិកម្ពុជា (CICC) មានគម្រោងចំនួន៥ សម្រាប់ចូលរួមអភិវឌ្ឍន៍ខេត្ត និងផ្តល់ការងារជូនប្រជាពលរដ្ឋក្នុងខេត្តសៀមរាប។ បើតាមជំនួបពិភាក្សា លោក ទៀ សីហា អភិបាលខេត្តសៀមរាប និង លោក Johnny Mo នាយកសមាគមពាណិជ្ជកម្មអន្តរជាតិកម្ពុជា (CICC)។
ជំនួបពិភាក្សានេះធ្វើឡើង កាលពីថ្ងៃទី២២ ខែមិថុនា ឆ្នាំ២០២៣ លោក Johnny Mo បានគូសបញ្ជាក់ថា គម្រោងទាំង ៥គម្រោង គឺផ្តោតទៅលើ៖
១-គម្រោងសេវាកម្មដឹកជញ្ជូនអគ្គិសនី, ២-គម្រោងមជ្ឈមណ្ឌលវប្បធម៌ព្រះពុទ្ធសាសនា
៣-គម្រោងមជ្ឈមណ្ឌលផលិតកម្មភាពយន្ត និងតន្ត្រីរបស់កម្ពុជា, ៤-គម្រោងគ្រប់គ្រងសណ្ឋាគារ និងអចលនទ្រព្យ និង ៥-គម្រោងផ្ទះចូលនិវត្តន៍។
នាឱកាសនោះ លោក ទៀ សីហា បានថ្លែងអំណរគុណយ៉ាងជ្រាលជ្រៅចំពោះ លោក Johnny Mo និងសហការី ដែលបានចូលជួបសម្តែងការគួរសម និងបង្ហាញអំពីគម្រោងទាំង ៥គម្រោង សម្រាប់អភិវឌ្ឍន៍ខេត្តសៀមរាបបន្ថែម ពិសេសគឺការផ្តល់ការងារជូនដល់ប្រជាពលរដ្ឋថែមទៀតផង៕
ដោយ៖ មឿន ឌីណា (Moeun Dyna)
