ភ្នំពេញ៖ កម្ពុជា ទទួលបានអ្នកដំណើរតាមផ្លូវអាកាស ២,១០៩,៦១២នាក់ កើនឡើង ៣៣៨%% ដែលមានជើងហោះចំនួន ២០ ៧៣៩ កើនឡើង ១៦៦% រយៈពេល៥ខែឆ្នាំ២០២៣ បើធៀបនឹងឆ្នាំ២០២២។
លោក ស៊ិន ចាន់សេរីវុត្ថា អនុរដ្ឋលេខាធិកា និងអ្នកនាំពាក្យអាកាសចរណ៍ស៊ីវិល បានឱ្យដឹងថា គិតមកដល់បំណាច់ខែ៥ ឆ្នាំ២០២៣ នេះមានក្រុមហ៊ុនអាកាសចរណ៍អន្តរជាតិចំនួន ២៦ក្រុមហ៊ុន បានតភ្ជាប់ជើងហោះហើរឡើងវិញគឺស្មើនឹងជាង ៥០% នៃឆ្នាំ២០១៩ ដែលកំពុងហោះហើរចេញ-ចូល កម្ពុជា ដែលនៅឆ្នាំ២០១៩ មានក្រុមហ៊ុនអាកាសចរណ៍ចំនួន៤៣ក្រុមហ៊ុន ដែលធ្លាប់បានធ្វើការហោះហើរ។
ផ្លូវហោះហើរដែលនាំមុខគេ នោះគឺផ្លូវហោះហើររវាង ភ្នំពេញ-បាងកក-ភ្នំពេញ និងភ្នំពេញ-សិង្ហបុរី-ភ្នំពេញ និងភ្នំពេញ-កូឡាឡាំពួរ-ភ្នំពេញ។ បើតាមការបញ្ជាក់របស់ លោក ស៊ិន ចាន់សេរីវុត្ថា បានបន្តថា អាកាសចរណ៍ស៊ីវិលរពឹងទុកថា ក្នុងពេលឆាប់ៗ នេះនឹងមានការកើនឡើងផ្លូវហោះហើរ រវាង កម្ពុជា-ចិន បន្ថែមទៀតនាពេលខាងមុខផងដែរ។
បើតាម Fresh News ដែលបានស្រង់សំដី លោក ស៊ិន ចាន់សេរីវុត្ថា បានឱ្យដឹងថា គិតមកដល់បំណាច់ខែ៥ ឆ្នាំ២០២៣នេះ ចំនួនជើងហោះហើរសរុប ក្នុង១សប្តាហ៍ នៅអាកាសយានដ្ឋានអន្តរជាតិទាំង៣ មានចំនួន ៤២២ជើង ក្នុង១សប្តាហ៍ ក្នុងនោះ៖ ភ្នំពេញទទួលបាន ជើងហោះហើរចំនួន ៣១៧ ជើងក្នុង១សប្តាហ៍ សៀមរាបទទួលបាន ជើងហោះហើរចំនួន ៩៨ ជើងក្នុង១សប្តាហ៍ និងខេត្តព្រះសីហនុទទួលបាន ជើងហោះហើរចំនួន ១១ ជើងក្នុង១សប្តាហ៕
ដោយ៖ មឿន ឌីណា (Moeun Dyna)
