ភ្នំពេញ៖ ទំហំពាណិជ្ជកម្មទ្វេភាគីកម្ពុជា-អាល្លឺម៉ង់ រយៈពេល៥ខែឆ្នាំ២០២៣ មានទឹកប្រាក់ ៤៣៥,៥២លានដុល្លារ ធ្លាក់ចុះ ១២,៦% បើធៀបរយៈពេលដូចគ្នា ចាប់ពីខែមករា ដល់ខែឧសភា ឆ្នាំ២០២២ មានចំនួន ៤៩៨,២១លានដុល្លារ។ នេះយោងតាមស្ថិតិជញ្ជីងពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា។
ស្ថិតិជញ្ជីងពាណិជ្ជកម្មរបស់អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា ទំនិញនាំចេញពីកម្ពុជាទៅអាល្លឺម៉ង់ មានទឹកប្រាក់ ៣៤៨,៧លានដុល្លារ ថយចុះ ១៨,៥% និងទំនិញអាល្លឺម៉ង់នាំមកវិញ ៨៦,៨២លានដុល្លារ កើនឡើង ២៣,៣% ពី ៧០,៤លានដុល្លារ។
គូសបញ្ជាក់ថា ទំនិញដែលប្រទេសកម្ពុជានាំទៅអាល្លឺម៉ង់មានភាគច្រើន ជាសម្លៀកបំពាក់ ស្បែកជើង កាបូប កង់ គ្រឿងបង្គុំអគ្គិសនី និងផលិតផលកសិកម្ម ខណៈទំនិញនាំចូលមកពីអាល្លឺម៉ង់ រួមមាន រថយន្ត គ្រឿងម៉ាស៊ីនធំៗ គ្រឿងសង្ហារិម និងគ្រឿងសំណង់ ជាដើម។
សូមរម្លឹកថា នៅឆ្នាំ២០២២ ការធ្វើពាណិជ្ជកម្មរវាងកម្ពុជា-អាល្លឺម៉ង់ មានទឹកប្រាក់សរុប ១ ២៤៦,៩លានដុល្លារ កើនឡើង ១៩,៣ % បើធៀបនឹងឆ្នាំ២០២១ ក្នុងនោះការនាំទំនិញពីកម្ពុជាមានចំនួន ១ ០៨៣,៦២លានដុល្លារ កើន ២៣% និងនាំចូល ១៦៣,២៨លានដុល្លារ ធ្លាក់ចុះ ០,៨%៕
ដោយ៖ មឿន ឌីណា (Moeun Dyna)
