ភ្នំពេញ៖ ចាប់ពីខែមករា-ខែមេសា ឆ្នាំ២០២៣ ការផ្លាស់ប្តូរពាណិជ្ជកម្មទ្វេភាគីកម្ពុជា-ឥណ្ឌូនេស៊ី មានទឹកប្រាក់ចំនួន ៣៩២,០៦លានដុល្លារ កើន២៧% បើធៀបនឹងឆ្នាំ២០២២ ដែលមានទឹកប្រាក់ ៣០៨,៦៩លានដុល្លារ។ នេះបើតាមតារាងស្ថិតិជញ្ជីងពាណិជ្ជកម្មអន្តរជាតិកម្ពុជា នៃអគ្គនាយកដ្ឋានគយ និងរដ្ឋាករកម្ពុជា
តារាងស្ថិតិជញ្ជីងពាណិជ្ជកម្មអន្តរជាតិកម្ពុជា បានបន្តឱ្យដឹងថា ការនាំចេញរបស់កម្ពុជាចំនួន ១៤,១៦លានដុល្លារ កើនឡើង ៦០,៦% និងទំនិញនាំពីឥណ្ឌូនេស៊ី ៣៧៧,៩១លានដុល្លារ កើនឡើង ២៦%។ បើផ្អែកតាមតួលេខនេះ គឺជញ្ជីងពាណិជ្ជកម្មកម្ពុជា មានឱនភាពរហូតដល់ ៣៦៣,៧៥លានដុល្លារ។
សម្រាប់ពាណិជ្ជកម្មទ្វេភាគីក្នុងខែមេសា ឆ្នាំ២០២៣ គឺមានទឹកប្រាក់ ៨៧,២១លានដុល្លារ ធ្លាក់ចុះ ៩,០៣% បើធៀបនឹងខែមេសា ឆ្នាំ២០២២ ដែលកម្ពុជានាំទៅឥណ្ឌូនេស៊ី ១,៩៥លានដុល្លារ កើនឡើង ៨,០៥% និងនាំចូល ៨៥,២៦លានដុល្លារ ធ្លាក់ចុះ ៩,៣៦%។
មូលហេតុដែលចំនួនទឹកប្រាក់នាំទំនិញពីឥណ្ឌូនេស៊ីមកកម្ពុជាមានច្រើនលើសលប់ធៀបការនាំចេញរបស់កម្ពុជា គឺដោយសារឥណ្ឌូនេស៊ីជាប្រទេសមានប្រជាជនច្រើន កម្លាំងសេដ្ឋកិច្ចធំ (ឥណ្ឌូនេស៊ី គឺជាសមាជិកប្រទេស G20) និងមានចង្វាក់ផលិតកម្មសម្បូរបែប។ បើតាមការលើកឡើងរបស់ លោក ហុង វណ្ណៈអ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា ដែលភ្នំពេញប៉ុស្តិ៍បានស្រង់សំដី។
លោក បានបន្តថា ទោះបីពេលនេះជញ្ជីងពាណិជ្ជកម្មអន្តរជាតិកម្ពុជាជាមួយនឹងឥណ្ឌូនេស៊ី មានឱនភាពច្រើន ប៉ុន្តែ ជាជំហានៗការនាំចេញទំនិញពីកម្ពុជាទៅប្រទេសឥណ្ឌូនេស៊ីនឹងកើនឡើង ព្រោះបច្ចុប្បន្នសមត្ថភាពផលិតនៅកម្ពុជាកំពុងកើនឡើងជាលំដាប់ទាំងផ្នែកកសិកម្ម និងឧស្សាហកម្ម។
សូមរម្លឹកថា ពាណិជ្ជកម្មទ្វេភាគីរវាងកម្ពុជា-ឥណ្ឌូនេស៊ី ឆ្នាំ២០២២ មានទឹកប្រាក់សរុប ៩៤៨,៥៣ លានដុល្លារ កើន ៤៨,៣% បើធៀបឆ្នាំ២០២១ ការនាំចេញរបស់កម្ពុជាចំនួន ៣៦,៨៤លានដុល្លារ កើនឡើង ១៥,៩% និងទំនិញនាំពីឥណ្ឌូនេស៊ី ៩១១,៦៩លានដុល្លារ កើន ៦០%៕
ដោយ៖ មឿន ឌីណា (Moeun Dyna)
